VERHAOLE
Midde in ’t Venlose Kloosterkwartier, naeve Domani, is ’t Jocus Museum te vinde.
In ‘t hert van de historische binnestad is ‘t ein unieke locatie wao bezeukers waere ôndergedompeld in de riéke 180 jäörige historie van de Venlose vastelaovend en van Jocus as aldste vastelaovendvereiniging van Nederland in ’t biézonder
Ein rondleiding door ’t Jocus Museum deurt ongeviër éin oor en kin aangevöld waere mit ein filmveurstelling in ôs auditorium.
In ’t Jocus Museum is ein vaste kôlleksie te zeen. De riéke kôllekties van ‘t Jocus Archief bringe ‘t verlaeje tot laeve. Begaaj ôg aan unieke veurwerpe, foto’s en films en nog vuuël miër!
De iërste berichte euver Vastelaovend-vieringe in de stad Venlo datere oét 1349. In Letiénse stadsraekeninge wuurt gespraoke van ein “Carnis privium”, ‘t aanbraeke van de vaste-tiéd.
In 1465 wuurt in alde stadsbeschriévinge geschreve van ein Vastenavond viering van “spoelluden ende gesellen, die opten taeffelen spoelden ende mytten swerden… dansden”.
In de iëuwe die volge zien d’r op wisselende momente meldinge van feeste van de viering van ein carnaval of ‘vastelavont’. Ein viering waat lang neet altiéd van zelfspraekend is gewaes. In verschillende tiédsperiodes woorte de vieringe door de Kerk of de Magistrate (‘t stadsbestuur) verbaoje. In andere jaor volgde weer ein bleuj-periode wao ‘t fees weer vuuël minse beejein brach. Zoë wuurt de Vastelaovend in Venlo al sinds iëuwe gevierd.
Theater van Klatergôld en Parelwien
Mit vastelaovend waere de rolle umgedreijd. De Vastelaovendgekke neme de stad euver: alle sociale range waere verbrand. Venlo verandert in ‘t Jocusriék wao Prins Carnaval de scépter zweijt.
Baovenal is ‘t ein volksfees det me veural môt ondergaon um det Vastelaovend geveul, det zoëvuël Venlonaere dan in ziene greep hild, te kinne beschriéve. “As de Joeks ôs Jocusriék regeert.”
Wao kump ’t waord Vastelaovend vandan?
Ziër waarschienlik is ‘t waord Vastelaovend ein verbastering van ‘t Hollandse vastenavond. Euver de perciese herkôms laupe de meininge oétein. De Vastelaovend is ‘t fees det veuraafgaond aan de vastentiéd plaats vind. De vastenaovend is d’n dinsdaag-aovend veuraafgaond aan as-woensdaag. Op as-woensdaag begint de vastentiéd, de viertig dage-tiéd van vaste en bezinning veuraafgaond aan Paose. Vas steit, det dit volksfees euver de ganse waereld op verschillende continente wuurt gevierd. De viéringe in Venlo en Limburg zien gebaseerd op ‘t Rienlandse Fasnach.
Miër informasie euver de geschiedenis van de Vastelaovend:
Vastelaovend beschriéving Wikipedia (Nederlandstalig)
Vastelaovend beschriéving Wikipedia (Ingelstalig)
Geschichte des Karneval (Duitstalig)
Geschiedenis Vastelaovend via SLV Limburg
